"ఇల్లు కొనడమా లేక అద్దెకుండడమా! ఏది నయం?" అనేటి అంశం రాబర్ట్ కియోసాకి ప్రాచుర్యంలోకి తెచ్చిన '90ల నాటి కంటే నేడు అధికమైన చర్చ (ఆర్భాటం అనడం బాగుంటుంది!) జరుగుతోందంటే పరిస్థితి ఎంతలా విషమించి వికటించిందో అర్థం చేసుకోవచ్చు.
ఆధునికత తెచ్చిన పలురకాలైన అభ్యుదయ సంస్కరణల్లో ఒకటి గృహవిపణి, అదే హౌసింగ్ మార్కెట్.
"గృహం నివాసం కదా, అంగడిలో అమ్మే ఒక వినియోగవస్తువు ఎలా అవుతుంద?"ని ప్రశ్నించడమో యోచించడమో ఎవరైనా చేశారో లేదో నాకు తెలియదు. ఎవరో ఒకరు చేసే ఉంటారని అనుకుంటున్నాను; అయితే వారి యోచనలు పిచ్చికేకలుగా, ప్రశ్నలు మృత్యుఘోషలుగా మిగిలిపోయి ఉండే అవకాశం మెండుగా ఉంది!
ఒకవైపు నివసించడానికి ఇల్లులేనివారైతే మరొకవైపు ఇంటితో వ్యాపారం చేసే విపణి. క్రైస్తవ మూలాలతో స్థాపించబడిన పరిశ్రమను (ఇండస్ట్రీ) చదవడం నాకున్న అలవాటు, అలాంటి అలవాటులో కాలనియతకు (కలోనియలిజం) ముందు "అద్దె" అనే మాటగానీ, ఆ అర్థంలో వాడుకలో ఉన్న మరొక పదంగానీ నాకు కనపడలేదు. అంటే కాలనియత జరగకముందు నివాసం ఉండడానికి ఎవరికి వారికే సొంతిల్లు ఉండేది అనుకోవాలి!
రాజ్యాలు పోయాయి, రాజులు & వారి వంశాలు పోయాయి, అనువంశిక పాలన & వృత్తులు పోయాయి అని సంబరపడే ముందుగా సొంతిల్లు అనేదిపోయి అద్దిల్లు అనేది వచ్చిందనే విషయం మరిచిపోవడం గమనార్హం; ఇది కూడా ఒకరకమైన మానసిక బానిసత్వమేనని నా ఉద్ధేశ్యం!
ఏదేమైనా, ఇప్పుడున్న యుగధర్మం ప్రకారం "సొంతిల్లు లేదా అద్దింట్లో ఏది నయం?" అంటే తిన్నగా నిక్కచ్చి సమాధానం చెప్పడం కష్టం. సమాధానం లేక కాదు, మనకు కొన్ని వాస్తవిక అంశాలను కూలంకషంగా అధ్యయనం చేసి తర్వాత ఒక పరిష్కారానికి వచ్చే సామర్థ్యం లోపించడమే కారణం. దీన్నే ఆంగ్లంలో స్టన్టింగ్ అంటారు, కొందరు దీన్ని మనుషులు ఎత్తు పెరగకపోవడంలో లోపం అంటారు, అనగా వారు దీన్ని శారీరక లోపంగానే చూస్తారు. నేను దీన్ని మానసిక మరియు భౌతిక లోపంగా కూడా చూస్తాను.
అలాంటి ఒక వాస్తవికత - మనం అద్దె ఇంట్లో ఉంటున్నామని మన కుటుంబంలో మరణాలు జరక్కుండా ఉండవు, అలాంటి సందర్భంలో ఇంటి యజమాని చెప్పే మొదటి మాట - "మీరు వేరే ఇల్లు చూసుకోండ"ని. సాక్షాత్తు బ్రహ్మస్వరూపమైన ఆత్మకు అప్పటిదాకా నివాసం కల్పించిన ఆ శరీరం కాలధర్మం పాటించి విగతయై ఇంకా అక్కడే పడి ఉండగా, ఆ విగతదేహానికి మరణ సంస్కారాలు జరపాలో లేక మరొక ఇల్లు అద్దెకు వెతుక్కునే పనిలో ఉండాలో తేల్చుకోలేని సంకటస్థితిలో(కి) మధ్యతరగతి హిందువులు ఉంటున్నారు & నెట్టివెయ్యబడుతున్నారు.
ఆ చచ్చిన మనిషి అంత్యక్రియలు జరపడానికి అద్దె ఇల్లు ఆటంకం; వయసుమళ్ళిన, లేవలేని తల్లిదండ్రులను మనం ఉద్యోగం చేస్తున్న ప్రాంతంలో మనతో ఉంచుకోవడానికి అద్దె ఇల్లు ప్రతిబంధకం. అనుకోకుండా ఉద్యోగంపోతే అప్పుచేసి మరీ అద్దె కట్టడం మనతో బలవంతంగా అనుభవింపజేస్తున్న దారిద్య్రం.
బ్రహ్మస్వరూపమైన ఆత్మకు నివాసం కల్పించిన దేహం ఆ ఆత్మ నుండి అద్దె తీసుకుంటుందా? తీసుకోవడంలేదు కదా, అంటే ఈ దేహం ఆ ఆత్మకు సొంతం; ఇది అలౌకికం. లౌకికంలో కూడా ఇదే వర్తించింది (ఇదే ఋతం!), ఒకప్పుడు. అందుకే అప్పట్లో ఇల్లు సొంతం. ఆత్మకు దేహం సొంతం, మనుషులకు నివాసం సొంతం.
మరి మనం నివాసం ఉండే ఇంటికి ఇప్పుడెందుకు అద్దె కట్టాలి?
ఆధునిక అభ్యుదయ (భూ)సంస్కరణల ఫలితం! ("భూ" అనేకంటే "స్థలం" అంటే బాగుంటుంది!)
అపరిమితమైన స్వేచ్ఛ తెచ్చిన చేటు!
ఎవ్వరైనా అమ్మొచ్చు, ఎవ్వరైనా కొనొచ్చు; మత్స్యన్యాయం!
వీటన్నిటికీ మూలమైన సిద్ధాంతం "కాలనియతకు దారితీసిన క్రైస్తవం" అనగానే నాలో కరుడుగట్టిన మతమౌఢ్యుడైన వ్యక్తి మీకందరికీ కనిపిస్తాడు.
అంతకుమించి చూడలేకపోవడమే స్టన్టింగ్!
"నా దగ్గరున్న స్థలం నాకు ఎందుకూ పనికిరాదుగానీ ఇంకొకరికి అది ఉపయోగకరం. కనుక వారికి కావాల్సింది స్థలం, అందుకు ప్రతిగా నాకు వారు కొంత రుసుము చెల్లించాల"నేది యూదుల సిద్ధాంతం, క్రైస్తవం పుణికిపుచ్చుకున్న వారసత్వం. ఇదే రెంట్ సీకింగ్ అనే సిద్ధాంతానికి మూలం. ఇక్కడ స్థలం పోషణనిచ్చే భూమిగాకాక సంపాదించే సాధనంగా కనిపిస్తుంది, కనుక అది అంగట్లో వస్తువు, వెరసి గృహవిపణి (హౌసింగ్ మార్కెట్).
ఆత్మకు దేహం నివాసం, దేహానికి ఇల్లు నివాసం & అద్దె కట్టడం దారిద్య్ర సూచిక మరియు సంస్కారనాశనానికి హేతువు.
కౌటిల్యుడు "నయం" అనే పదాన్ని భౌతిక లాభానికి సూచికగా వాడతాడు, పూర్వం క్షేమం అనే అర్థంలో వాడేవారు, మనమీ ఆధునిక కాలంలో ఈ పదాన్ని వాడుకలోనూ ఉంచడంలేదు.
ఆఖరి అలోచన - మొదటి శ్రేణి పట్టణాల్లో ఇళ్ళస్థలాలు (భూమి కాదు) కొనలేని వారందరూ రెండవ/మూడవ శ్రేణి నగరాలకు తరలుతున్నారు. మరక్కడ (మొదటి శ్రేణి పట్టణాల్లో) అద్దెకు ఉంటూ ఉద్యోగం చేసే దిగువ మధ్యతరగతి హిందువులు ఇంటిస్థలం కోసం ఎక్కడికి వెళ్తున్నారో, ఏం చేస్తున్నారో తెలుసా?
దేవాలయాల భూముల్లో ఇళ్ళు కట్టుకుంటున్న వారిని ఒకసారి పరికించి చూడండి. కబ్జాలు (ఆక్రమణ) ఎవరు చేస్తున్నారో, ఆ దేవాలయ భూముల్ని సెక్యులర్ ప్రభుత్వాలు ఎందుకు పంచుతున్నాయో కాస్త అర్థం అవుతుంది. ఇందుకు ఉదాహరణగా ఏలూరు జిల్లా ఆగిరిపల్లి మండలం నూజివీడు సంస్థానాధీశులు శ్రీ వ్యాఘ్ర లక్ష్మీనరసింహస్వామి వారికి సమర్పించుకున్న భూములు ఏమయ్యాయో తెలుసుకునే ప్రయత్నం చెయ్యండి.
మరి స్వామివారికి ఆదాయం? ఆ దేవాలయం మీద ఆధారపడి బ్రతుకుతున్నవారి జీవనం? భూమికే పతియైన ఆ విష్ణువుకే భూములు మిగల్చకుండా మింగేస్తున్నది ఎవరు?
దిగువ మధ్యతరగతి నెపాన్ని రాజకీయపార్టీలపై, ఎన్నుకున్న నాయకులపై, కొలిచే దైవంపై నెట్టేసి ఎన్నెన్ని పాపకార్యాలు చేస్తున్నారో మచ్చుకు ఇదొక ఉదాహరణ మాత్రమే. కాబట్టి ఇక్కడున్న మధ్యతరగతి జనాలు బైబిల్ నీతులు చెప్పడం కాస్త తగ్గిస్తే బాగుంటుంది.
నిజ శ్రావణ శుక్ల తదియ, 2080
Comments
Post a Comment